Ministri i Shëndetësisë, Ilir Beqaj, theksoi sot se “deri në shtator do përpiqemi që të kemi gati fondin prej 40 milionë euro për investime në Qendrën Spitalore Universitare “Nënë Tereza”, në Tiranë”.
Gjatë analizës vjetore të QSUT-së, Beqaj tha se projektet për qendrën më të madhe spitalore në vend do të nisin këtë vit, ndërkohë që nga mesi i marsit do të jenë gati paketat e reja shëndetësore. “Barnat e reja (pa alternativë) marrin rreth 1 /3 e buxhetit”, u shpreh Beqaj.
“Shëndetësia është sistemi më i nënfinancuar, por përpara se të kërkojmë ndjeshëm investimet, detyra jonë e përbashkët është të tregojmë se mund të bëjmë edhe më shumë”. Ministri Beqaj kërkoi nga mjekët të reduktojnë kërkesat për shtyrjen e moshës së pensionit . Drejtoresha e QSUT-së, Ogerta Manastirliu tha se “në buxhetin e 2014 ka dyfishim të fondeve për barnat citostatikë , ndërsa gjatë këtij viti do të investohen për shtatë salla operacioni në spitalin e ri”. QSUT është ndërmarja më e madhe në vend me 2700 punonjës./ Eriola Çuko
