Ministri i Shëndetësisë, z. Ilir Beqaj, inspektoi sot disa farmaci në kryeqytet, mes të cilave edhe farmacitë “FarmaNet”, tek të cilat mund të gjenden falas gazetat “Shëndet+”. Ministri ndoqi nga afër zbatimin e betejës së shpallur në fillim të shtatorit të Qeverisë kundër informalitetit në përgjithësi dhe në sektorin e kujdesit shëndetësor në veçanti.
Ministri Beqaj duke blerë në farmacinë “Farma Net”
“Do të doja të shfrytëzoja këtë mundësi për t’i bërë thirrje të gjithë qytetarëve që kanë jo vetëm detyrimin ligjor, por edhe angazhimin qytetar, për të kërkuar në çdo aktivitet ekonomik kuponin tatimor, edhe në farmaci edhe në njësi të tjeta të shërbimit shëndetësor në çdo sistem, përfshirë vizitat dentare apo ekzaminimet laboratorike e imazherike”, u shpreh ministri i Shëndetësisë teksa u fut për të blerë në një nga farmacitë e rrjetit “Farma Net”, ku duken edhe gazetat “Shëndet+”, të ofruara falas për klientët.
Gazetat “Shëndet+” e ofruara në farmacitë “Farma Net”
Ky aksion është në vazhdën e inspektimeve kundër informalitetit në njësitë e shërbimeve shëndetësore.
