SHBA – Një grua nga Nju Xhersi do të marrë mbështetje vetëm për njërën nga binjaket që ka lidnur, pasi dy vajzat kanë baballarë të ndryshëm. Vendimi u mor nga një gjyqtar i Gjykatës së Lartë, i cili shqyrtoi rastin. Gjyqtari urdhëroi një seancë dëgjimore pasi testet rutinë të atësisë zbuluan se burri ishte babai i vetëm njërës prej vajzave të lindura në janar të vitit 2013.
Gjyqtari i çështjes u bazua në deklaratën e ekspertëve që shpjeguan se nëse vezoret e një gruaje çlirojnë dy vezë gjatë një cikli menstrual, të dyja vezët mund të fekondohen. Kjo do të sillte binjakë të dy vezëve, pra të lindur në të njëjtën kohë, por me pamje të ndryshme.
Por kur gruaja ka kryer seks me dy burra të ndryshëm brenda të njëjtit cikël, siç u pranua edhe nga vetë ajo, dhe të dyja vezët fekondohen, binjakët kanë baballarë të ndryshëm.
Shkencëtarët janë shprehur se raste të tilla jo vetëm nuk janë të rralla, por po shënojnë rritje.
Një studim i vitit 1997 tregoi se 1 në 13000 raste të binjakëve ishin me dy baballarë, kjo e bazuar në testet e ADN-së për atësinë.
“Sot besohet se rastet e binjakëve me baballarë të ndryshëm po rriten me shpejtësi të madhe krahasuar me para 50 vjetëve, kjo si pasojë e teknologjisë ndihmëse riprodhuese, imoralitetit apo faktorëve të tjerë”, shkroi gjyqtari në vendimin e tij.
Ai gjithashtu tha se ky ishte rasti i parë i këtij lloji në Nju Xhersi, ndërsa citoi se kishte gjetur dhe dy raste të tjera në Amerikë, një në qytetin e Nju Jorkut dhe i dyti në Denver të Kolorados.
/ Përgatiti: Arlinda Gjypi
