Kam probleme me rënien e qerpikëve prej disa vitesh. Pavarësisht se nuk kam asnjë shqetësim/ simptomë tjetër, do doja të dija nëse ka ndonjë kurë/ mjekim për ndalimin e rënies pasi kjo më ndikon shumë psikologjikisht.
Përgjigjet Eneida Rustemi, mjeke okuliste pranë shërbimit të Pediatrisë së Përgjithshme në QSUT.
Kjo quhet blefarit, dhe mund të jetë ose alergjik që më pas kthehet në kronik ose i shkaktuar nga refraksioni. Blefariti është kronik kur nuk ka çrregullime refraksioni por vetëm dëmtim të rrënjës së qerpikëve (qerpikët nuk dalin drejtë, e kanë rrënjën e shtrembër), ku krijohet një si kore, sytë skuqen dhe qerpikët fillojnë e bien.
Në këtë rast ne rekomandojmë të mbahet një higjienë shumë e mirë e syve. Rrënja e qerpikëve duhet pastruar gjithmonë shumë mirë, për këtë ka medikamente të posaçme, ose pacienti mund t’i fërkojë dhe vetë me ujë të ngrohtë në mënyrë që të zbrazet folikuli dhe të dizenfektohet syri me një lloj zbutësi ose lot artificial. Në rast se janë të inflamuara, ne japim edhe antibiotik, pasi në raste të rralla mund të agravojë deri në blefarit ulceroz./ Shendeti.com.al
