Çmimi Nobel në Mjekësi është fituar nga tre shkencëtarë Harvey J. Alter, Michael Houghton dhe Charles M. Rice të cilët zbuluan virusin e Hepatitit C.
Komiteti i Nobelit deklaroi në një njoftim për shtyp të hënën se tre shkencëtarët “kanë bërë një zbulim shumë të rëndësishëm në luftën kundër hepatitit të transmetuar nga gjaku, një problem shëndetësor i rëndë që shkakton cirrozë dhe kancer të mëlçisë”.
Organizata Botërore e Shëndetësisë (OBSH) vlerëson se janë rreth 70 milionë raste në mbarë botën të prekur me Hepatit C. Një pjesë e madhe e tyre kanë zhvilluar cirrozë ose kancer të mëlçisë.
“Është një betejë e gjatë. Hepatiti C ka shkaktuar vdekje po aq, apo në mos më shumë, se pandemia aktuale e koronavirusit”, shprehet Gilbert Thompson, profesor në Kolegjin Imperial të Londrës.
“Falë zbulimit të tyre, sot janë të disponueshme analiza gjaku mjaft të specializuara për virusin, të cilat e kanë eliminuar në thelb hepatitin pas transfuzionit të gjakut në shumë vende, duke përmirësuar ndjeshëm shëndetin e njerëzve në mbarë botën”.
“Zbulimi i tyre ka ndihmuar në zhvillimin e shpejtë të medikamenteve antivirale kundër Hepatitit C. Për herë të parë në histori, sëmundja mund të kurohet, duke dhënë shpresë për eliminimin e Hepatitit C te njerëzit”.
Burimi: CNN
