Pandemia e COVID-19 u ngadalësua sërish këtë javë në të gjithë botën, duke vazhduar rënien e saj që filloi në fund të gushtit.
Rreth 400 000 raste të reja në ditë
Me 403 300 infektime të regjistruara çdo ditë në botë, këtë javë, treguesi është në rënie me -5%, në krahasim me javën e kaluar.
Ulje në shumicën e rajoneve
Këtë javë, shumica e rajoneve të botës kanë parë një përmirësim të situatës së tyre epidemiologjike: -23% e rasteve të regjistruara në Afrikë, -21% në zonën e Amerikës Latine/Karaibeve, -19% në Lindjen e Mesme, -16% në Azi dhe – 14% në zonën e SHBA-së/Kanadasë.
Evropa (+ 13 %) dhe Oqeania (+ 11 %) janë dy zonat e vetme ku situata ka vazhduar të përkeqësohet këtë javë.
Përshpejtim më i fortë
Gjeorgjia, ku 27 % e popullsisë ka marrë të paktën një dozë të vaksinës COVID-19, është vendi ku epidemia po përshpejtohet më së shumti (+ 79 %, 3 300 raste të reja në ditë), ndër vendet që kanë regjistruar në të paktën 1 000 infektime ditore gjatë javës së kaluar.
Pas këtij vendi kaukazian, përshpejtimet më të forta të javës janë kryesisht në vendet evropiane, Irlandë (+ 50 %, 1 700) dhe Holandë (+ 49 %, 2 500), ku më shumë se 70 % e popullsisë tashmë kanë marrë të paktën një dozë të vaksinës, si edhe në Poloni (+ 42 %, 2 000) dhe Letoni (+ 42 për qind, 1 700), ku vetëm gjysma e popullsisë ka marrë tashmë një dozë.
Rëniet më të forta
Në të kundërt, Izraeli (-48 %, 1 600) është vendi me rënien më të fortë këtë javë, përpara Kubës (-32 %, 3 000), Guatemalës (-31 për qind, 1 400), Kosta Rikës (-29 %, 1 100) dhe Vietnamit (-25 %, 3 900).
Infektimet më të mëdha
SHBA-ja mbetet deri tani vendi me numrin më të madh të infeksioneve të reja në terma absolutë këtë javë (86 800 raste ditore, -14 %), përpara Britanisë së Madhe (38 700, + 13 për qind) dhe Turqisë (30 500, + 5 %).
Si pjesë e popullsisë, pa mikroshtetet, vendi me numrin më të madh të rasteve këtë javë është Letonia (623 për 100 000 banorë), përpara Serbisë (598) dhe Gjeorgjisë (585).
Vdekjet
SHBA-ja ka numrin më të lartë të vdekjeve ditore, 1 563 në ditë këtë javë, përpara Rusisë (967) dhe Meksikës (350). Globalisht, vdekjet ditore vazhdojnë të bien (6 741 në ditë, -6%).
Vaksinimi
Vendet që po vaksinojnë më shpejt këtë javë janë kryesisht në Amerikën Latine, Azi dhe Oqeani. Kuba mbetet në krye, me 1,92% të popullsisë së saj të vaksinuar çdo ditë. Deri më sot, Emiratet e Bashkuara Arabe është vendi më i vaksinuar në botë, ku 86% e popullsisë është plotësisht e vaksinuar, përpara Portugalisë (85 për qind), Spanjës dhe Singaporit (me nga 78%).
