Fondi i Sigurimeve Shendetesore miratoi sot në mbledhjen e Këshillit Administrativ projekt-vendimin për financimin e paketave të plota të disa shërbimeve të nefrologjisë, të kardiologjisë, kardiokirurgjisë, dhe implantin koklear.
Më konkretisht, bëhet fjalë për 10 shërbime spitalore: Dializa, Transplanti i veshkave, Terapia e flakjes akute, Pacemaker definitive, Angiografi koronare, Angioplastikë koronare, Interventet valvolare, Intereventet kongenitale, By pass koronar dhe Implanti koklear për fëmijët me probleme dëgjimi.
Ministri i Shëndetësisë, Ilir Beqaj, njëherësh kryetar i Këshillit Administrativ të Fondit, si dhe drejtori i Fondit të Sigurimeve Shëndetësore, dr. Astrit Beci, përgëzuan punonjësit e Fondit dhe 15 profesorët e këtyre shërbimeve në QSUT, që konkretizuan me sukses kostifikimin e paketave për herë të parë dhe në një kohë rekord.“Ju përgëzoj për punën cilësore dhe intensive që keni bërë, ku brenda 4 muajsh arritët të finalizonit paketat e plota të disa shërbimeve mjaft të rëndësishme”, u shpreh ministri Beqaj.
“Me hartimin e këtyre paketave, konkretizojmë qasjen e re të Institucionit tonë dhe të Qeverisë, për të financuar shërbimet shëndetësore në bazë të vlerës reale, për t’u përdorur me efikasitet për nevojat e pacientëve. Interesi ynë është përmirësimi i shërbimeve ndaj pacientit dhe rritja e aksesit në marrjen e shërbimeve, duke e shtrirë financimin edhe në sektorin privat”, u shpreh drejtori i Fondit të Sigurimeve Shëndetësore, dr. Astrit Beci.
Paketat e shërbimeve shëndetësore do të financohet nga Fondi në masë të njëjtë si në institucionet shëndetësore publike, ashtu dhe për ato private. Do të krijohet për herë të parë, regjistri i përfituesve të paketave shëndetësore, i cili do të mbahet në Fond dhe administrimi i tij do të bëhet në bashkëpunim me shërbimet universitare.
Përfituesit e këtyre paketave do të mbulohen 100% nga Fondi, si në rastin e marrjes së shërbimit në spitalet publike, ashtu edhe në ato private, që do të kontraktohen nga Fondi i Sigurimeve Shëndetësore. Kostot e përcaktuara tashmë do të kenë gjithashtu një marzh fitimi, i cili për të gjitha institucionet shëndetësore publike, do të përdoret si e ardhur dytësore për institucionin. Projekt/vendimi i Këshillit Adminitrativ të Fondit, i cili përfshin kostot, marzhin e fitimit dhe mënyrën e financimit të këtyre paketave, do të kalojë për miratim në Këshillin e Ministrave.
Më pas do të ofrohet shërbimi bazuar në kontrata të mirëpërcaktuara, sipas protokolleve klinike, të cilat do të hartohen nga Ministria e Shëndetësisë brenda 30 ditësh nga hyrja në fuqi e vendimit. Ndërsa Fondi I Sigurimeve shëndetësore, do të krijojë për herë të parë regjistrin e përfituesve të paketave shëndetësore brenda 60 ditëve nga hyrja në fuqi e vendimit të Qeverisë.
Gjithashtu Fondi do të monitorojë dhe cilësinë e ofrimit të këtyre paketave, me qëllim përdorimin me efektivitet të burimeve financiare. Me financimin e këtyre paketave, do të kemi transparencë në administrimin e fondeve si dhe krijojmë një treg konkurrence mes sistemit publik e privat, në funksion të përmirësimit të kujdesit shëndetësor për popullatën.Mbulimi 100% i kostove të këtyre shërbimeve nga Fondi i Sigurimeve Shëndetësore, është një tjetër premtim i mbajtur, për të shkuar drejt ofrimit të shërbimeve mjekësore pa pagesë.
Ky premtim, së bashku me mbulimin e kontrollit bazë për popullatën 40-65 vjec si dhe shtimi i ilaceve të reja në listën e rimbursimit, janë hapa cilësore drejt realizimit të programit të Qeverisë për shërbim shëndetësor bazë pa pagesë për të gjithë popullatën/ Almarina Gegvata
