Ministri i Shëndetësisë, Ilir Beqaj ka vizituar zonën e Maqellarës në Dibër, ku u ka premtuar banorëve se “pranverën e vitit të ardhshëm do të kenë një qendër të re shëndetësore të pajisur me aparatura të reja, që do të bëjnë të mundur ekzaminimin dhe diagnostikimin e sëmundjeve”.
Sipas kreut të shëndetësisë, do të jetë një financim i Qeverisë Zvicerane prej 90 mijë eurosh, i cili do të bëjë të mundur rikonstruksionin e plotë të godinës ekzistuese, si dhe pajisjen e saj me të gjitha barnat dhe pajisjet e nevojshme.
Ai ka njoftuar gjithashtu se duke filluar nga java e ardhshme, autoambulancat nuk do të jenë të stacionuara vetëm në Spitalin e Peshkopisë, por do të shpërndahen në disa pika në rreth, në mënyrë që të shkurtohet shumë koha e përgjigjes ndaj rasteve që vijnë në urgjencë.
“Nga java e ardhshme, një autoambulancë që deri më sot ishte në spital, do të të jetë e stacionuar gjithmonë në Maqellarë në mënyrë që të ketë kohë në rastet kur nevojitet vetëm për të vajtur në spital dhe jo për të ardhur nga Peshkopia deri në Maqellarë,” tha Beqaj.
Nga ana tjetër, Drejtori i Qendrës Kombëtare të Urgjencës Mjekësore, dr. Skënder Brataj, pohoi se autoambulancat e reja janë të pajisura me aparatura të cilat mund të kryejnë goditje elektrike, elektrokardiogramë, si dhe matje të parametrave të zemrës për pacientët me sëmundje kardiake.
Në të gjithë vendin janë 20 autoambulanca të reja të cilat janë të pajisura me këtë lloj aparature./ https://shendeti.com.al/
