Ja çfarë rekomandohet të kenë në përbërjen e tyre kremrat që përdorim gjatë stinës së dimrit. -Aloe vera – me veprim hidratues, rigjenerues të lëkurës dhe mjaft efikas dhe në trajtimin e dermatiteve dhe psoriazës.
Krem me bazë gjalpi – (në anglisht e gjejmë me termin “shea butter”) me veprim hidratues, zbutës, mbrojtës. Ka veti të depërtojë thellë në lëkurë duke rritur elasticitetin e saj. Përdoret edhe si zbutës i skalpit të thatë të kokës dhe si ushqyes i flokëve.
Vaji i jojobës – është një nga vajrat më hidratues për lëkurën, pasi përthithet lehtësisht prej saj duke depërtuar përmes poreve të vogla të epidermës. Këshillohet tek lëkurat e thata duke e aplikuar çdo ditë me masazh ose mund të shtojmë disa pika te kremi i ditës para aplikimit.
Vaji i avokados – vaj antirrudhë që i jep lëkurës butësi dhe elasticitet. Në aspektin e përthithjes nga epiderma është më efikas pas banjës, kur lëkura është e ngrohtë dhe e lagësht.
Vaj i embrionit të grurit – ky vaj është koncentrat i vitaminës E, forcon filtrin hidrolipidik të lëkurës duke zgjidhur problemin e lëkurave të thata e të tendosura. Rekomandohet të përdoret në lëkurë çdo darkë dhe një herë në javë shtresë të trashë në të gjithë fytyrën si maskë. Hiqet pas 15-20 minutash me pecetë sasia e tepërt. Mund të përdoret edhe tek kremi i natës duke shtuar disa pika para aplikimit.
Vaji i bajames – ka efekt ushqyes dhe zbutës të epidermës si për të rritur, ashtu dhe për fëmijët e foshnjat.
Acidi hialuronik – është “ngjitësi” që bashkon kolagjenin me elastinën duke i bërë të punojnë së bashku në lëkurë. Ai është gjithashtu mbajtës i ujit duke hidratuar dhe fryrë lëkurën, si dhe zvogëlon shfaqjen e rrudhave.
