Në kuadër të Ditës Botërore kundër HIV/AIDS (1 dhjetor) dhe fushatës “NO HATE SPEECH”, shoqata “Together For Life” dhe gazeta “Shëndet+” organizojnë një aktivitet ndërgjegjësimi (10:00 – 12:00) tek parku Rinia, Tiranë.
Gjatë këtij aktiviteti do të shpërndahen materiale promovuese shëndetësore, si: gazeta, broshura apo intervista të printuara, të marra prej mjekëve profesionistë, si dhe do të flasim për diskriminimin që personat e prekur nga HIV/AIDS pësojnë nga shoqëria e painformuar.
Në një intervistë për gazetën “Shëndet+”, mjeku infeksionist Gentian Stroni thotë se “një masë efikase është përdorimi i kondomit mashkullor gjatë raporteve seksuale rastësore, po ashtu dhe ulja e numrit të partnerëve seksualë.
“Rëndësi ka evidentimi dhe eliminimi i donatorëve të gjakut që i përkasin kategorive të riskut ndaj infeksionit të virusit HIV, gjithashtu, kontrolli dhe ruajtja sipas standardeve e gjakut të dhuruar.
“Parandalimi fokusohet edhe në mospërdorimin e ageve dhe instrumenteve të tjerë mjekësorë të kontaminuara në ambientet spitalore. Gjithashtu, kjo masë duhet të shtrihet dhe të përdoruesit e drogave venozë, të cilët mund të përdorin të njëjtën age për disa persona te personat që realizojnë tatuazhe, akupunturë etj.”
Dita Botërore Kundër HIV/AIDS është shumë e rëndësishme për të rikujtuar rëndësinë e informimit të mirë shëndetësor për një jetë të gjatë e pa probleme.
