Denisa Canameti, gazeta “Shëndet+”
Raporti Përfundimtar i Auditimit të ushtruar në Institutin e Shëndetit Publik me objekt: “Mbi zbatimin e përputhshmërisë, ligjshmërisë dhe rregullshmërisë financiare”, për periudhën 01.10.2012-31.12.2013, konstaton disa shkelje të cilat përkthehen në miliona lekë dëm. Për shkeljet e konstatuara në administrimin e vlerave materiale e monetare raporti i auditit ka propozuar 
masë “Largim nga puna”, për personat shkaktarë përgjegjës. Konkretisht kjo masë u dha për N.drejtoren ekonomike, Përgjegjësen e Administratës, Përgjegjësen e Sektorit të Financës, specialisten e financës dhe ekonomisten.
Gjithashtu, raporti i auditit konstatoi se Instituti i Shëndetit Publik ka bërë emërime në vitet 2012-2013, në kundërshtim me Urdhrat e Ministrit të Shëndetësisë.
Këto konstatime të bëra në 2014-n për ISHP-në vazhdojnë që të jenë njësoj problem. Në një investigim të bërë nga gazeta “Shëndet+”, rezulton se asnjëri prej këtyre emrave, të cilësuar si shkelës nuk është pushuar nga puna. Ata vazhdojnë aktivitetin e tyre normal në këtë institucion.
Gjatë këtyre ditëve gazeta “Shëndet+” e ka patur të vështirë të marrë një informacion në rrugë zyrtare. Trokitjet në zyrën e shtypit të këtij institucioni kanë qenë të kota, pasi specialisti i marrëdhënieve me publikun nuk është gjendur aty, as edhe një ditë të vetme, një javë rresht.
