Përshëndetje, desha të bëja 1 pyetje në lidhje me ushqimin. Ç’ushqim duhet ngrënë që të shtosh peshë brenda 1 ose 2 javësh dhe a është e vërtetë që gjatësia të merr shëndetin? Jam 16 vjeç, 1.75 i gjatë dhe peshoj 58 kg dhe kam provuar të shtoj peshë 
por nuk fuksionoi.
Përgjigjja nga Rolina Naco, dietologe
Përshendetje! Si fillim do doja të përmendja se në rastin e moshës tuaj (adoleshenca) që jeni 16 vjeç, organizmi juaj veçse përdor energjinë e marrë nga ushqimi për nevojat ditore, e përdor atë edhe për zhvillimin e trupit. Kjo ndalon ose ulet ritmi rreth moshës 18-19 vjeç, ku dhe ju mund të shtoni më shumë peshë. Pas plotësimit të zhvillimit, trupi ynë ka nevojë për energji thjesht për të plotësuar nevojat ditore të trupit (metabolizmi) dhe të sasisë kalorike që ne djegim në bazë të aktivitetit fizik që kemi. Atëherë është edhe më e lehtë për të vënë disa kile më shumë nëse jemi shumë të dobët. Pra fjala popullore që të merr shëndetin gjatësia, nuk mund të themi se është e saktë, pasi edhe zhvillimi normal është pjesë e shëndetit tonë.
