Një mjek i urgjencës dhe një infermier janë vënë nën akuzë për veprën penale të “mosdhënies ndihmë” nga prokuroria e Korçës. Sipas njoftimit zyrtar të policisë së qytetit juglindor, “nga ana e specialistëve të krimeve, në Komisariatin e Policisë 
Korçë, në bashkëpunim edhe me Prokurorinë e Rrethit Gjyqësor Korçë, sot më datën 30.04.2015 , filloi procedimi penal në gjendje të lirë për shtetasit: Ç. F., me detyrë mjek pranë Shërbimit të Urgjencës, dhe A. C., infermier pranë këtij institucioni”.
Sipas burimeve zyrtare të policisë rezulton se ditën e mërkurë, rreth orës 16:00, bluzat e bardha kanë marrë njoftim për t’i ardhur në ndihmë dhe për ta transportuar për në urgjencë shtetasin A.D, i cili ishte në gjendje të dehur. Por, pasi kanë konstatuar rastin dhe kanë kontakuar me të, as mjeku dhe as infermieri nuk kanë marrë masa për ta transportuar në urgjencë. Në një video të shpërndara në rrjetet sociale u pa se në fakt personi thjesht ishte tërhequr zvarrë duke u lënë në anë të trotuarit dhe më pas autoambulanca u largua pa i dhënë ndihmën shëndetësore.
Si rrjedhojë, ndaj dy bluzave të bardha ka filluar hetimi në gjendje të lirë për “mosdhënie ndihme”. A.Gj.
https://www.youtube.com/watch?v=wa88ktwwlHg
