“Jemi pjesë e rriskuar e shoqërisë, mes nesh ka pasur edhe viktima”
Edhe Urdhri i Farmacistëve të Shqipërisë kërkon nga qeveria përfshirjen në planin e vaksinimit të punonjësve të shëndetësisë. Në shkresën drejtuar Ministrisë së Shëndetësisë, Urdhri thekson se “Është e pashpjegueshme që në një situatë të tillë pandemie, farmacistët mos t’i shohësh si kontigjent me risk të lartë karshi infeksionit Covid-19, krahas kolegëve të tjerë punonjës të shëndetësisë mjek e infermierë. Për 12 muaj përballje me këtë armik, farmacistët shqiptarë për asnjë moment të vetëm nuk patën mbështetjen e shtetit sikurse bluzat e bardha gjatë kësaj kohe të vështirë”.
Më tej Urdhri i Farmacistëve të Shqipërisë shprehet në letër se “të shumtë janë farmacistët e infektuar në frontin e punës, mes tyre pati edhe nga ata të cilët e humbën betejën me Covid-19. Të rriskuar ishin edhe janë edhe familjarët e farmacistëve, të cilët jetojnë së bashku me riskun e profesionit të familjarit të tyre, përfundon kërkesa e Urdhrit të Farmacistëve”./tvklan
