Nga mjeku Viktor Qereshniku
Përdorimi i pijeve alkoolike është një kënaqësi. Pavarësisht nga efektet e ndryshme të provokuara nga birra, vera, alkooli, aperitivët dhe kokteilet e ndryshme nga doza dhe gradacionet alkoolike, eksperienca e përgjithshme është që shumica ndihen mirë. Në doza të moderuara ndihet një efekt qetësues dhe një sensacion mirëqenieje. Në një traktat tjetër mjekësor, në vitin 
2002, alkooli përshkruhet si një substancë me të cilën mund të abuzohet lehtë dhe se efekti i qetësisë, euforisë, ndjenja e mirëqënies, etj., konsiderohen vetëm si fillimi i problemeve: kërkojnë të pinë për të pasur këto ndjenja pozitive, por ky zakon krijon një lidhje që do t’i shoqërojë gjithë jetën, duke i provokuar dëmtime të rënda organizmit të tyre.
Siç do të shikojmë në vijim, efektet e alkoolit në tonusin dhe humorin, si edhe në mënyrën e sjelljes, shpjegohen me mekanizma që e kanë zanafillën në tru dhe në vijim, duke përdorur pije alkoolike për një kohë të gjatë, krijohet një varësi nga alkooli që favorizon abuzimin.
Vartësia është një çrregullim i mënyrës së sjelljes, që nga një gjë e thjeshtë dhe e zakonshme, arrihet në një kërkim të ekzagjeruar dhe patologjik, për të përftuar kënaqësinë prej alkoolit. Kështu arrihet në patologji. Personi që ka arritur vartësinë, humbet mundësinë e kontrollit të mënyrës së jetesës.
Vartësia nga alkooli
Sipas Organizatës Botërore të Shëndetësisë, alkoolistët “janë pijetarë me një vartësi alkoolike që ka arritur nivele kaq të larta, saqë manifestojnë një çrregullim të theksuar fizik apo një ndërhyrje në shëndetin e tyre fizik dhe mendor, me reaksione që ndihen në zhvillimin e tyre social dhe ekonomik apo në ato subjekte që tregojnë shenja fillestare të një shfaqje patologjike”. Vartësia është pra një aspekt kryesor i alkoolizmit dhe është ajo që e transformon një zakon të të jetuarit në një sindrom patologjik.
