Shfaqja e vetes në Instragram, Twitter, iPhone dhe në cilëndo media sociale po ndryshon mënyrën se si personat, veçanërisht të rinjtë, e shohin veten. Një fakt i tillë mbështetet nga anëtarët e Akademisë Amerikane të kirurgjisë plastike dhe rindërtuese, të cilët kanë prezantuar në Uashington rezultatet e një studimi të kryer tek 2700 kirurgë plastikë amerikanë. Lajmi raportohet nga agjencia ANSA.
Specialistët thonë se ka një rritje prej 10% në vit për ndërhyrje në fytyrë, sidomos tek të rinjtë e moshës nën 30 vjeç, qofshin meshkuj apo femra. Rinoplastika (ndërhyrja në hundë) është rritur me 10% , mbjellja e flokëve me 7% dhe heqja e rrudhave të syve me 6%, thuhet në studim.
“Rrjetet sociale kanë krijuar komplekse estetike dhe një sy më të rreptë vëzhgues përkundrejt imazhit personal, sepse ata që përdorin rrjete të tilla e konsiderojnë pamjen e jashtme thelbësore për të zënë miq, për të pasur marrëdhënie romantike apo për motive profesionale”, thotë Eduard Farrior, president i akademisë. /A.Gjypi
