Frika për humbjen e vendit të punës mund të rrisë rrezikun e prekjes nga astma. Punët e pasigurta e rrisin rrezikun me 24%, ndërsa frika se do ta humbin 
punën së shpejti, brenda dy vjetësh e rrit rrezikun me 60%. Ky është studimi i fundit i kryer nga Instituti i Mjekësisë Sociale dhe të Punës në Universitetin e Dyseldorfit, të cilët kanë studiuar për herë të parë lidhjen mes krizave astmatike dhe stresit të punës. Studimi u publikua në revistën “British Medical Journal” dhe përfshiu 7000 nëpunës, burra dhe gra.
Studimi u krye nga viti 2008 deri në vitin 2011 me rritjen e krizës ekonomike kudo në Evropë.
Në këtë periudhë kërkuesit zbuluan shfaqjen e 105 rasteve të reja të astmës, gjysma tek burrat e gjysma te gratë, të cilët ishin të shqetësuar për fatin e punës së tyre. “Ekziston një lidhje mes astmës dhe stresit të punës, – shpjegojnë kërkuesit. – Lidhja është edhe më e dukshme mes nëpunësve me të ardhura më të ulëta, mes të rinjve dhe beqarëve”.
“Kemi zbuluar se ata që nuk ndihen të sigurt se do të arrijnë një kontratë me kohë afatgjatë janë më të prirur për të kaluar në depresion”, përmbyllin autorët./ Arlinda Gjypi
