Një mrekulli ndodhi sot në spitalin e Peshkopisë. Personeli dha gjak dhe shpëtoi jetën e një gruaje shtatzënë, e cila rrezikonte të humbte jetën.
Nga fshatrat e Bulqizës gruaja shtatzënë u dërgua me urgjencë në repartin e gjinekologjisë së Peshkopisë. Nadire Zeneli ishte heroina që ndërroi fatin e nënës së re.
“Këta janë heronjtë e heshtur, personeli mjekësor. Faleminderit atyre”, u shpreh Shpresa Biçi, nga Urdhri i Infermierit.
Pjese e ekipit që kanë luftuar brenda në sallë për të mbajtur në jetë gruan shtatzënë kanë qenë edhe mjeku obstetër gjinekolog Bajram Balliu, si dhe mjeku anestezist reanimator Riza Matoshi.
Pa dashur të prononcohen gjatë për mediat, mjekët që asistuan në sallë tregojnë për “Shëndet+” emocionet dhe ankthin e jashtëzakonshëm që kanë përjetuar në ato momente si dhe lumturinë e madhe kur gjithçka u finalizua me sukses.
‘Jemi lodhur, kemi qarë nga stresi se po ikte e sëmura, pastaj lot gëzimi që ja arritëm qëllimit’ shprehen mjekët mes emocioneve.
Nëpër spitalet e rretheve punohet në kushte tepër të vështira. Por mjekët jo në pak raste urgjence kanë treguar se dinë të shpëtojnë njerëzit.
