Për gazetën “Shëndet+”, nga dietologia Rolina Naço
Ka disa ushqime që janë të shëndetshme dhe që janë të mira për ata që vuajnë nga hipertensioni.
Hudhra: Është përdorur që në lashtësi për kurimin e hipertensionit. Sipas studimeve të fundit duket se hudhra është multifuksionale dhe se përveç uljes së tensionit, mund të parandalojë dhe vendosjen e kalciumit dhe të yndyrës në arteriet koronare. Gjithashtu, ka dhe efekte kurative përsa i përket arteriosklerozës, pra mund të ulë masën e mbetjeve në arterie deri në 20%, sipas një studimi të bërë në Gjermani.
Përdorimi i hudhrës këshillohet e pagatuar, për të marrë vlerat maksimale ose të paktën të mos gatuhet më shumë se 3 minuta.
Rrushi i kuq: Bëhet fjalë për rrush të kuq ose të zi me fara, pasi vetitë kuruese janë pikërisht te fara dhe lëkura e rrushit, dhe jo te pjesa e ‘tulit’ që përmban një sasi të lartë glukoze. Flavonoidet që përmbajnë, parandalojnë oksidimin e kolesterolit të kuq, e cila vetëm e oksiduar mund të ngjitet te arteriet tona. Vlerat antioksiduese të rrushit të kuq parandalojnë mpiksjen e gjakut që përbën vetvetiu faktor rreziku të arteriosklerozës. Por kujdes! Nuk duhet të konsumohet sasi të madhe, por shpesh dhe në mënyrë të moderuar.
