‘’Nuk ka kryeministër në Evropë si kryeministri shqiptar, i cili pasi konfrontohet nga të dhëna të pakundërshtueshme të hajdutërisë së ministrave të tij, të Beqaj, llogaria e të cilit ka shkuar 31 milionë euro tendera…’’, është kjo deklarata e kreut të opozitës, z. Lulzim Basha, e bërë në nëntor të vitit 2015, që ka nxitur ministrin e Shëndetësisë, Ilir Beqaj, që ta padisë për shpifje.
Beqaj ka bërë sot publike padinë e ngritur ndaj kreut të PD-së më 22 shkurt 2016 për fyerje dhe shpifje në publik. Në një njoftim për mediat, Ministria e Shëndetësisë shkruan: “As përpjekjet e mjeruara të Lulit, as shpifjet apo përbaltja e sejmenëve të tij, nuk do të mund të na ndalin në rrugën tonë për reformimin rrënjësor dhe rilindjen nga mjerimi dhe katastrofa ku PD-ja e kishte katandisur shëndetësinë shqiptare.
Ne padinë e dorëzuar ne Gjykate, ministri thotë se ka ardhur koha që Lulzim Basha të provojë përpara drejtësisë shpifjet në adresë te tij.
“Nëse Lulzim Basha do të faktojë jo 31 milionë euro, po edhe 31 mijë lekë vjedhje në adresën time, unë do të tërhiqem nga aktiviteti publik, dhe do të shkoj përpara drejtësisë. Por në të kundërt, Lulëzim Basha do të duhet të përballet me ndëshkimin e merituar moral e civil, sepse sa për ndëshkimin politik, atë ai do ta marrë me siguri nga populli në zgjedhjet e ardhshme, njësoj siç e mori në referendumin e tij qesharak të 21 qershorit të shkuar”, deklaron Beqaj.
Më poshtë do të gjeni një kopje të padisë që Ministri Beqaj ka depozituar më datë 22 shkurt 2016 ndaj kryetarit të Partisë Demokratike.
KerkesePadi-IlirBeqajvsLulzimBasha-22shkurt2016
