“Shqipëria është duke përjetuar një intensitet të lartë të infeksioneve respiratore si një pjesë e mirë e rajonit evropian. Aktualisht Shqipëria gjendet në periudhën e epidemisë së gripit. Viruset që qarkullojnë këtë vit janë AH1N1pdm09 dhe AH3N2, të cilët janë të përfshirë në vaksinën e gripit”. Kështu u shpreh gjatë takimit të kryer lidhur me situatën gripale në vend, drejtori i Institutit të Shëndetit Publik, Arjan Bregu. AH1N1pdm09 është i njohur si gripi i shpendëve, ndërsa AH3N2 si gripi i derrave.
Bregu tha se gripi nuk duhet të neglizhohet dhe që në shenjat e para të shfaqjes së tij, duhet të konsultoheni me mjekun e familjes dhe mjekun pediatër. Mjeku i familjes dhe pediatri duhet të vlerësojnë me seriozitet të gjitha shenjat me të cilat çdo i sëmurë dyshohet i infektuar me virusin e gripit.
Të gjitha të dhënat vlejnë për të mbrojtur popullatën nga virusi i gripit dhe sidomos format e rënda të tij, të cilat shkaktojnë insuficiencë akute respiratore të rëndë dhe komplikacione te tjera .
Gripi sezonal është një infeksion viral akut, i cili përhapet lehtë nga njeriu tek njeriu. Gripi mund të prekë çdo njeri në çdo grupmoshë. Virusi i gripit transmetohet nga njeriu tek njeriu me spërkla gjatë teshtimave, kollitjes apo gjatë bisedës me një person të infektuar. Më rrallë një individ mund të infektohet me virusin e gripit duke prekur objekte të kontaminuara nga virusi dhe pastaj individi të prekë gojën apo hundën me duart e infektuara.
Periudha e inkubacionit zgjat nga 1-4 ditë. Një individ i prekur nga virusi i gripit mund të infektojë të tjerët 1 ditë para shfaqjes se simptomave, gjatë periudhës së sëmundjes. Pra, një person i prekur nga virusi i gripit mund t’ia transmetojë virusin një personi tjetër përpara se ai ta kuptojë që është i sëmurë.
