Në kuadër të projekteve të bashkëpunimit ndërkombëtar në fushën e sëmundjeve të lindura të gjakut, ku Shqipëria është përfituese e faktorëve antikoagues, Italia ka ofruar mbështetje për trajtimin e të sëmurëve me hemofili, në sajë të bashkëpunimit mes Ministrisë Shëndetësisë, Rajonin e Toskanës dhe Spitalit Universitar “Meyer” në Firenze.
Ministrja e Shëndetësisë dhe Mbrojtjes Sociale, znj. Ogerta Manastirliu mori pjesë në mbledhjen e palëve të organizuar në Senatin Italian, ku u sigurua mbështetje e mëtejshme për Shqipërinë për trajtimin e sëmundjeve të lindura të gjakut, sidomos për sigurimin e faktorit VIII, i cili është jetik për të sëmurët hemofilikë.
Të dhënat e siguruar nga Gazeta Shëndet Plus tregojnë se në Shqipëri janë rreth 200 persona të prekur nga hemofilia. Hemofilia është një çrregullim i përhershëm gjakderdhjeje në të cilën një nga faktorët thelbësorë të mpiksjes së gjakut mungon. Të sëmurëve u nevojiten kryesisht faktorët VIII dhe IX për të parandaluar hemorragjitë dhe hematomat, por thonë se asnjëherë nuk arrijnë të marrin sasi të mjaftueshme për shkak të mungesave në institucion. Këta 2 faktorë janë medikamentet kryesore që stimulojnë artificialisht koagulimin e gjakut.
Ministrja Manastirliu zhvilloi me herët një takim zyrtar me zv. sekretarin e Ministrisë së Shëndetësisë në Itali, z. Armando Bartolazzi, ku palët u dakordësuan për forcimin e bashkëpunimit dhe shkëmbimit të ndërsjelltë midis Shqipërisë dhe Italisë për shëndetin publik, në fushën farmaceutike, bashkëpunimin mes spitaleve, edukimin dhe trajnimi e mjekëve.
Bashkëpunimi do të formalizohet me marrëveshjen e re mes dy vendeve tona, e cila pritet të firmoset së shpejti nga ministrat respektivë të Shëndetësisë./ Shendeti.com.al
