Personat e pasiguruar do të mund të kryejnë vizitë shëndetësore falas tek mjeku i familjes. Nga një ndryshim që i është bërë ligjit “Për Sigurimin e detyrueshëm të kujdesit shëndetësor në RSH”, është vendosur që Fondi i Sigurimit të Detyrueshëm të 
Kujdesit Shëndetësor të merret me mbulimin e shërbimit të kujdesit shëndetësor ndaj kësaj kategorie njerëzish. FSDKSH sqaroi se falas do të jetë vetëm vizita që kryen mjeku i familjes, ndërkohë që sa i takon procedurës që do të ndiqet në këtë rast, mjafton që çdo person të paraqitet pranë qendrës shëndetësore për të marrë shërbimin. Deri tani, personat e pasiguruar duhet të paguanin një tarifë prej 1000 lekësh të reja për t’u vizituar tek mjeku i familjes
“Pavarësisht se nga pikëpamja teorike sigurimi shëndetësor mbulon potencialisht të gjithë popullatën, një pjesë e saj, e cila nuk vërteton dot statusin “i siguruar”, detyrohet të paguajë për vizitën tek mjeku i familjes”, sqaron “Fondi”. Ndërkaq, përveç lehtësimit të pacientëve, ofrimi falas i këtij shërbimi duket se do të eliminojë edhe pagesat në dorë, që sipas FSDKSH-së, kanë qenë prezentë.
Ky ndryshim ligjor nuk kërkon fonde shtesë, pasi pagesa e mjekut të familjes mbështetet mbi numrin e banorëve të territorit që ai mbulon. Ligji nuk ka hyrë ende në fuqi, pasi pritet botimi në Fletoren Zyrtare./ Blertina Koka
