Përshtati për gazetën “Shëndet+”: Blertina Koka
Shkencëtarët kanë zbuluar një trajtim të ri për kancerin e gjirit, i cili zhduk tumoret në vetëm 11 ditë. Femrat që preken nga kanceri i gjirit tani nuk do të kenë nevojë t’i nënshtrohen kimioterapisë për t’u kuruar.
Mjekët përdorën dy ilaçe për kancerin, Tyverb dhe Herceptin, të cilat ua injektuan grave që sapo ishin diagnostifikuar me kancer. Ky kombinim i ilaçeve zhduki tumoret tek 11% e pacienteve me kancerin e gjirit HER2-pozitive dhe zvogëloi në minimum madhësinë e kancerit tek më shumë se 17% e pacienteve. Gjithashtu, numri i qelizave kancerogjene filloi të binte tek gati 90% e pacienteve.
Kjo do të thotë se femrat që janë prekur nga ky lloj kanceri nuk do të kenë më nevojë t’i nënshtrohen kimioterapisë për disa javë, nëse marrin ilaçet direkt pasi diagnostifikohen me këtë sëmundje dhe para se të operohen.
Pavarësisht rezultateve të arritura, Nigel Bundred, profesor i onkologjisë kirurgjike tek Universiteti i Mançesterit, i cili prezantoi studimin tek Konferenca Evropiane e Kancerit të Gjirit në Amsterdam, deklaroi se duhet të bëhen me tepër kërkime dhe studime për të konfirmuar këto rezultate.
Në fazën e dytë të testimit u përfshinë 127 paciente të diagnostifikuara me kancer të gjirit, të cilat u ndanë në tre grupe. Njëri grup i mori të dyja ilaçet, Herceptin dhe Tyverb, grupi tjetër mori vetëm ilaçin Herceptin dhe pacientet e grupit të tretë nuk morën asnjë trajtim për 11 ditë pasi u diagnostifikuan me këtë sëmundje dhe para operacionit.
Gati 87% e pacienteve që morën të dyja ilaçet filluan të përmirësoheshin ndërsa numri i qelizave kancerogjene filloi të binte.
Ky studim ka lënë pa fjalë shumë shkencëtarë, të cilët e kanë quajtur si një arritje historike në mjekësi.
Burimi: Indepedent / https://shendeti.com.al/
