Bisedoi: Elona Tereziu
Kanceri kolorektal është një prej patologjive më rënda me të cilat përballet aparati tretës. Krahasuar me tumoret e tjera, ai renditet i dyti në listë për sa i përket vdekshmërisë, me një incidencë më të rritur tek meshkujt.
Dhimbje barku, diarre, humbje oreksi, rënie në peshë, gjak në jashtëqitje, anemi e pashpjegueshme janë vetëm disa nga shenjat paralajmërueseë të tij, megjithëse shpeshherë shfaqet dhe pa këto simptoma.
Nevila Lengu, mjeke gastrohepatologe pranë Poliklinikës së Specialiteteve Nr. 1 në kryeqytet flet më tepër lidhur mbi këtë patologji, duke renditur edhe faktorët predispozues, rëndësinë e kapjes në kohë dhe mënyrat e parandalimit.
Çfarë është kanceri kolorektal?
Një prej problemeve më të rënda me të cilat përballet aparati tretës në organizmin e njeriut është kanceri i zorrës së trashë. Krahasuar me tumoret e tjera, renditet i dyti në listë për sa i përket vdekshmërisë, me një incidencë lehtësisht më të rritur tek meshkujt krahasuar me femrat.
Kanceri kolorektal, për nga vetë emri, është një patologji malinje që prek zorrën e trashë. Sipas statistikave botërore, renditet si tumori i dytë malinj pas kancerit të prostatës tek meshkujt dhe i treti tek femrat pas tumoreve të gjoksit.
