Përshtati për gazetën “Shëndet+”: Blertina Koka
Karotat nuk janë të mira vetëm për sytë. Nëse konsumohen në mënyrë të rregullt, këto perime ulin shanset e zhvillimit të kancerit të gjirit tek femrat me 60%. Frutat dhe perimet e tjera të pasura me pigmentin beta-karotene, si spinaqi, piperi i kuq dhe mangoja, kanë të njëjtin efekt. 
Beta-karotene është substanca që u jep ngjyrën ushqimeve bimore. Për vite me radhë shkencëtarët kanë rekomanduar që ta përfshijmë këtë perime në dietën ushqimore, për të luftuar sëmundje të ndryshme. Ndërsa studimi i fundit, i publikuar në “American Journal of Clinical Nutrition”, tregon përfitimet që sjell kjo perime sa i përket kancerit të gjirit.
Shkencëtarë nga e gjithë Evropa intervistuan 1,500 femra të diagnostifikuara me kancerin e gjirit dhe 1,500 të tjera që nuk vuanin nga asnjë sëmundje. Ata u pyetën për dietën e tyre ushqimore, dhe kryen teste gjaku për të matur nivelin e pigmentit beta-karotene dhe substancave të tjera bimore, si vitaminën C dhe likopenë.
Në fund shkencëtarët dolën në përfundimin se femrat që konsumonin ushqime të pasura me substancën beta-karotene, si karotat dhe piperi, ishin 40% deri 60% më pak të rrezikuara për të prekur nga kanceri i gjirit.
“Gjithkush mund të ulë rrezikun për t’u prekur nga kanceri i gjirit dhe shumë sëmundje të tjera nëpërmjet një jetese të shëndetshme, si duke mbajtur peshën e duhur, duke konsumuar një dietë të pasur me ushqime të ndryshme, duke qenë më aktivë dhe duke pirë sa më pak alkool”, thotë Dr. Dr Richard Berks, drejtues i organizatës së bamirësisë “Breast Cancer Now”.
Burimi: Daily Mail / https://shendeti.com.al/
