Blertina Koka / Shendeti.com.al
Falë shpirtit të madh dhe bujar të këngëtarit kosovar Labinot Tahiri dhe kontributit të dhjetëra qytetarëve të tjerë, është bërë i mundur sigurimi i shumës për kurimin e 3-vjeçarit nga Podujeva, Besim Kurtolli.
Besimi është diagnostikuar me sëmundjen e rrallë “Hiperoksaluria Tip1” dhe ka nevojë urgjente për trajtim dhe shërim jashtë vendit, duke qenë se trajtimi i kësaj sëmundjeje nuk mund të bëhet në Kosovë. Vogëlushi duhet t’i nënshtrohet menjëherë një operacioni për transplantim të mëlçisë dhe veshkës. Për shërimin e tij në Gjermani familjes Kurtolli i janë kërkuar 250 mijë euro.
Klinika e Universitetit Bonn në Gjermani ka rënë dakord për të ndihmuar Besimin, por familja nuk mund të përballojë shpenzimet për kurim jashtë vendit.
Këngëtari Labinot Tahiri, i njohur për veprat e tij të bamirësisë, u ka kërkuar ndihmë të gjithë miqve dhe ndjekësve të tij në rrjetet sociale që të kontribuojnë për shërimin e Besimit të vogël dhe të arrijnë t’i kthejnë buzëqeshjen.
Thirrjes së këngëtarit të njohur i janë përgjigjur shumë qytetarë brenda dhe jashtë Kosovës, si dhe disa personalitete të njohura, mes tyre edhe këngëtarja kosovare Shkurte Gashi dhe futbollisti Bernard Berisha. Ata kanë bërë të mundur që brenda 48 orëve të sigurohen plot 200 mijë euro, ndërkohë që nevojiten edhe 50 mijë euro deri të premten.
Lajmin për shumën e mbledhur e ka bërë publik vet këngëtari Labinot Tahiri përmes profilit të tij në rrjetin social Facebook.
Zoti ynë të përkulemi përjetësisht që na e dhe një gjak që ta kemi të përbashkët dhe pastaj neve si Komb Shqiptar që po na përkrahin edhe të tjerët.
Shqiptar vëllezër e motra.
Janë tubuar 200.000 euro deri më sot.
Deri të premten dhe mos dërgoni më para.
Zoti qoftë i kënaqur me ju! Hallall
