Denisa Canameti
Ditën e mërkurë, më datë 21 tetor, në ambjetet e repartit të urgjencës së Shërbimit infektiv një pacient ka kërcënuar me jetë personelin punonjës duke filluar nga mjeku. Shkak i këtij kërcënimi është bërë mungesa e medikamenteve e përkatësisht mungesa e serumit antitetanik SAT.
Mjeku në shërbim nuk ka pranuar që të identifikohet me emër, kjo sepse sipas bluzave të bardha që punojnë në atë pavion situata është e njëjtë çdo ditë, për çdokënd. Kërcënimet dhe dhuna verbale është bërë pjesë e përditshëmrisë dhe punës së mjekëve. Mungesa e theksuar e medikamenteve në atë pavion i vë mjekët çdo ditë përballë vështirësive dhe konflikteve me pacientët.
Duke marrë shkas nga kjo situatë mjekët kanë nënshkruar një peticion ku kërkojnë që të sigurohet me forca të sigurisë reparti i urgjencës së shërbimit infektiv. Niveli i ulët i suigurisë në spital është bërë shkak për përplasje fizike midis pacientëve dhe mjekëve. Kjo sepse rojet dihet tanimë se janë vendosur aty pa plotësuar asnjë lloj kushti apo kriteri minimal.
Gjithashtu është kërkuar që të merren masa që të sigurohen medikamentet bazë të nevojshme për repartin e urgjencës.
Të përmirësohen kushtet e punës në këtë repart bazuar në standardet e miratuara nga MSH për shërbimet e urgjencës
Të ndryshojë trajtimi i mjekëve që shërbejnë gjatë 24 orëve pranë urgjencës
Të shihet mundësia e rishikimit të strategjisë së QSUT-së në lidhje me inufikimin e repartit të urgjencës së shërbimit infektiv me urgjencën e përgjithshme të QSUT-së.
Ky peticion ka kaluar për t’u firmosur nga gjithë mjekët e të atij pavioni, për t’ja dorëzuar më pas drejtorisë së QSUT-së.
