Një organizatë e mbështetur nga OKB njoftoi të enjten se ka nënshkruar marrëveshje me më shumë se njëzet kompani të barnave për të prodhuar versione të pilulës Covid-19 të Merck për të furnizuar 105 vende në zhvillim.
Grupi i Patentave të Medikamenteve tha se marrëveshjet do t’i jepnin mundësi kompanive të barnave të prodhojnë edhe lëndën e parë për molnupiravirin, edhe vetë produktin përfundimtar.
Molnupiravir, i zhvilluar nga Merck dhe Ridgeback Therapeutics, është raportuar se ka përgjysmuar normën e shtrimeve në spital të pacientëve me shenja të hershme të Covid-19. Britania, Bashkimi Europian dhe SHBA-ja autorizuan përdorimin e tij gjatë muajve të fundit.
“Ky është një hap i rëndësishëm drejt sigurimit të aksesit global ndaj një medikamenti për Covid-19 që nevojitet urgjentisht,” tha Charles Gore, drejtor ekzekutiv i Grupit të Patentave të Medikamenteve.
Grupi tha se 27 prodhues të barnave në 11 vende të ndryshme, duke përfshirë Bangladeshin, Kinën, Egjiptin, Vietnamin, Kenian dhe Afrikën e Jugut, do të fillonin së shpejti me prodhimin e pilulës së zhvilluar nga Merck.
Një pilulë antivirale që njerëzit mund ta marrin edhe në shtëpi për të reduktuar simptomat e tyre dhe për t’u shëruar më shpejt, mund të jetë një zgjidhje e re, që do të lehtësojë ngarkesën e jashtëzakonshme të spitaleve dhe do të ndihmojë në frenimin e përhapjes së virusit në vendet më të varfra që kanë sisteme të dobëta të kujdesit shëndetësor.
Ky medikament do të forconte gjithashtu luftën në dy fronte ndaj pandemisë: trajtimi i simptomave me ilaçe dhe parandalimi nëpërmjet vaksinimeve.
Merck njoftoi në tetor se do të lejonte kompanitë e tjera farmaceutike që të prodhonin molnupiravir. As Merck – Ridgeback Biotherapeutics dhe as Universiteti Emory, i cili shpiku këtë ilaç, nuk do të përfitojnë përmes patentës së tyre nga shitjet e molnupiravirit nga kompanitë e tjera, për sa kohë që Covid-19 mbetet një emergjencë shëndetësore globale.
Deri më sot, asnjë prodhues i vaksinave kundër koronavirusit nuk ka rënë dakord për një marrëveshje të tillë./ DW
