Përfshirja e komunitetit në vendimmarrjen për shërbimet shëndetësore dhe vënia e pacientit në qendër të kujdesit shëndetësor ishte tema e takimit të sotëm të zhvilluar në Ministrinë e Shendetësisë. Në të morën pjesë ekspertë të projektit “Mbështetje Reformës në Shëndetësi”, të financuar nga USAID, drejtues të institucioneve të kujdesit shëndetësor dhe administratës së spitaleve rajonale në vend, në lidhje me mësimet e nxjerra nga zbatimi i ndërhyrjeve të këtij projekti dhe mbështetjen e duhur që ndërhyrje të tilla të mund të funksionojnë me sukses edhe në spitalet e tjera publike.
Në fjalën e tij, ministri Ilir Beqaj theksoi nevojën për një qasje të re të spitaleve dhe institucioneve të kujdesit shëndetësor për sjelljen ndaj pacientit dhe përfshirjen e komunitetit, duke bërë thirrje për një marrëdhënie të re ndërmjet mjekut dhe pacientit. “Spitalet publike duhet të jenë jo vetëm vendet ku njerëzit mjekohen, por edhe qendra që mishërojnë solidaritetin e kulturën shoqërore”, tha midis të tjerash ministri.
Në takim mori fjalën edhe drejtoresha e gazetës “Shëndet Plus”, Eglantina Bardhi. Mes të tjerash ajo ngriti problemin e mungesës së informacioneve edukuese dhe ndërgjegjësuese për popullatën në mediat vendase. “Asnjëra nga mediat nuk e ka përparësi informimin e popullatës lidhur me reformat dhe problematikat që mbart ky sektor”, theksoi Bardhi, ndërsa vijoi se problem mbetej fakti i mosdedikimit të një gazetari për shëndetësinë, si dhe mungesës së trajnimeve për ta. Duke e cilësuar gazetën “Shëndet Plus” si e vetmja në vendin tonë që është tërësisht e përqendruar në sektorin e shëndetësisë, Bardhi tha se ajo ka si qëllim informimin, ndërgjegjësimin dhe edukimin e popullatës për shëndetin dhe një stil jetese të shëndetshëm.
Gazeta ka bashkëpunuar edhe USAID-in për suplementin “Mbështetje Reformës në Shëndetësi” duke pasquruar kështu histori suksesi në spitalet ku po zhvillohet ky projekt”.
