Denisa Canameti / Shëndet+
Kanceri “zgjedh”! Por në përzgjedhje nuk pyet nëse je i rritur, fëmijë, grua, burrë, president apo një qytetar i thjeshtë.
Pak kohë më parë, “e zgjedhura” e tij ishte edhe Xhuljana, e cila e festoi 18-vjetorin e shtrirë në një krevat të ftohtë spitali.
“Ky paska qenë fati im”, tha.
E në atë kat ndodheshin dhe shumë të “përzgjedhur” të tjerë, të cilët, si ajo, ishin dorëzuar e që si Luli i vocërr zgjasnin dorën për pakëz “kurë”.
Epo, jo miq! Unë refuzoj të pranoj që pamundësia ekonomike t’u vjedhë atyre jetën, teksa janë me fat që ndryshe nga shumë të tjerë, kanë mundësinë (nga ana mjekësore) të çlirohen prej tij.
Unë e di që dy sytë e Xhuljanës, ashtu sikurse dhe të 6 të tjerëve të zgjedhur nga ne, pafajësisht dhe pa vetëdije, besojnë në mrekulli.
Ëndrra e tyre është të jetojnë, ndaj le të përpiqemi me sa mundësi kemi, t’ua bëjmë ëndrrën realitet.
Nisma TUNGJATJETA (nismë e të rinjve shqiptarë) organizon më 31 maj ora 18:30 një koncert bamirësie në Qendrën Kulturore, pranë Katedrales Ortodokse, Tiranë.
Por kësaj nisme kaq fisnike, pjesë e së cilës janë bërë me kënaqësi këngëtarët Aleksandër Gjoka, Gent Bushpepa, Lorenc Hasrama, Andi Nika, Erik Lloshi, Anxhela Peristeri e shumë të tjerë, i mungon diçka që ata të mund të festojnë fitimtarë.
MUNGONI JU MIQ!
Le t’i japim së bashku zë mrekullisë!
Ne mund t’ia dalim!
