Lajmi për vdekjen e 6 pacientëve me HIV AIDS në QSUT u mbajt i fshehur nga strukturat e spitalit, derisa u bë publik nga deputetja e PD-së, Albana Vokshi.
Gjatë Komisionit të Shëndetësisë, i cili u organizua para disa ditësh, deputetja Vokshi, njëkohësisht edhe kryetare e komisionit, deklaroi se “për 10 ditë kanë vdekur 6 pacientë me HIV AIDS për shkak të mungesës së medikamenteve”. (lexo këtu)
Këto akuza janë konfirmuar zyrtarisht nga shefi i shërbimit të infektivit në QSUT, Arjan Harxhi. Z. Harxhi konfirmoi se brenda një muaji në shërbimin e infektivit në QSUT kanë vdekur 6 persona të sëmurë me HIV/AIDS. Dy prej tyre hoqën dorë nga mjekimi me dëshirë.
Sipas të dhënave, mësohet se personat ndërruan jetë në QSUT në periudhën prill-maj. “Për të sëmurët me HIV/AIDS ka mungesa të preparateve, por plotësohen me ilaçe alternative. Mungesat janë jo ndikim i drejtpërdrejtë për shëndetin”, theksoi Harxhi./ https://shendeti.com.al/
