Denisa Canameti
Pas rreth dy muajsh vonesë, Qendrat Shëndetësore duket se do të fillojnë të pajisen me aparaturat e nevojshme që të nisë dhe puna për të shumëpriturin kontroll shëndetësor falas për moshat 40-65 vjeç. Sot pranë Qendrës Shëndetësore të Kamzës 
mësohet se kanë ardhur aparaturat e nevojshme për nisjen e check-up-it.
Sina Qerpja, punonjëse pranë kësaj qendre, flet për gazetën “Shëndet+” duke treguar se gjithçka është bërë gati për të nisur punë pas tre ditësh.
E pavarësisht entuziazmit, ende nuk dihet se si do të realizohet lajmërimi i qytetarëve që përfitojnë nga ky shërbim. Pasi deri më sot nuk është lajmëruar askush. Teksa thuhet se puna fillon pas tre ditësh, në fakt më parë duhet të bëhet lajmërimi i personave.
E përfolur prej shumë kohësh si projekti më i madh i shëndetësisë në vend për buxhetin që ka marrë, kontrolli shëndetësor falas i moshave 40-65 vjeç u tha se do të niste ditët e para të muajit janar.
Megjithëse sot data është 12 shkurt, ende nuk ka qendra që të kenë filluar këtë kontroll, pavarësisht pritshmërive të mëdha. Shumë qendra shëndetësore nuk kanë as kushtet minimale për t’u ofruar shërbim njerëzve.
