“Për herë të parë kontrolli i shëndetit falas për të gjithë shqiptarët nga 40 deri në 65 vjeç pranë Qendrave Shëndetësore”. Ky është statusi i vënë në faqen e “Facebook”-ut të Fondit të Sigurimit të Detyrueshëm të Kujdesit Shëndetësor.
E megjithëse cilësohet si nisma më e madhe e sistemit shëndetësor në Shqipëri, skepticizmi është në maksimum. Përgjigjet e njerëzve bazohen në atë çka ndeshin përditë në spitale e poliklinika.
“Te QSUT mund të bësh falas vetëm analizën për grupin e gjakut, ndërsa analizat e tjera duhen bërë përballë te Spitali Amerikan, shkruan një nga komentuesit, ndërsa vazhdon: – “Nuk e kuptoj pse paguhen siguracionet, kur po nuk pagove të lënë në urgjencë pa t’i hedhur sytë me orë të tëra. Edhe pse je në urgjencë, nuk ka një krevat të lirë, ndërsa me 1000 lekë të gjejnë dhomë të lirë. Një fjalë e vjetër thotë: Mos pafsh as armikun aty, se hyn i shëndoshë e del i sëmurë”.
“Mos u tallni me popullin, investoni në shëndetësi e jo në reklamë për vete. Blini aparatura dhe pajisje që kanë nevojë njerëzit, specializoni mjekët dhe luftoni korrupsionin dho boll me reklama pa lidhje që të duket sikur punoni”
“Këto që thoni janë vetëm fjalë boshe, se asnjë analizë nuk bëjnë ambulancat! Është vetëm reklamë”.
“Të kemi besim vallë? Se kur vemi në shtet për të bërë analizat, në spital na thonë nuk ka material dhe detyrohemi të marrim borxh për të vajtur në privat. Për shembull, analizat e tiroideve në spital për bashkëshortin nuk i bëra se nuk kishte material dhe i bëmë tek greku me 5300 lekë…”
