Denisa Canameti
Shërbimi i Onkologjisë, janar 2015
Kimioterapia përbën shtyllën e trajtimit të kancerit. Ajo bën të mundur çrrënjosjen e qelizave tumorale të përhapura në organizëm me gjakun. Trajtimi sistematik me kimio përmirëson dukshëm shëndetin e të sëmurëve me kancer. Në përgjithësi në varësi të skemës së mjekimit, ajo mund të jetë ditore (ambulatore) ose në rastet e tjera, e shtrirë në harkun e disa ditëve ku për pacientët është i mundur hospitalizimi.
Por çfarë u ofron spitali onkologjik këtyre personave të hospitalizuar me kancer? Janë pyetje të pafundme që mund të ngrihen për QSUT-në, për spitalet dhe kushtet që ato ofrojnë. Janë 1000 dyshime që mund të hidhen në ato suksese që numërohen nga Ministria e Shëndetësisë. Sigurisht që QSUT-ja e Tiranës nuk është shembulli më i mirë i një spitali, edhe pse është spitali qendror, spitali që (mirë) pret mijëra njerëz brenda një dite. Është thënë se që në 365 ditët e para të qeverisjes është bërë i mundur mbulimi me medikamente i të gjithë spitalit. Nuk do të ketë më pacientë që do të dalin jashtë spitaleve për medikamente. Realiteti tregon ndryshe, pacientët flasin ndryshe.
Ilaçin e kimios pacientët e shtruar në spitalin onkologjik të Tiranës e blejnë me paratë e tyre. Një ilaç që kushton jo pak, por 2 500 – 3 000 lekë të reja. Një medikament tepër i shtrenjtë për pacientë që kanë një nivel mesatar jetik.
