Denisa Canameti
GlaxoSmithKline, një nga kompanitë më të mëdha farmaceutike britanike, vendos të largohet nga tregu shqiptar. Kjo kompani i siguronte tregut tonë barna shumë të rëndësishme, si: Augmentin (antibiotik), Zinnat (antibiotik), vaksina të ndryshme, 
Lamictal (antiepileptik) etj.
Nuk dihen ende arsyet se pse kompania britanike e ka marrë këtë vendim, megjithatë dyshohet se të ketë ndodhur për shkak të “rrëmujës” së madhe që ekziston dhe kthimit në monopol të tregut tonë farmaceutik nga një kompani e vetme.
Veçanërisht gjatë këtyre ditëve po përflitet fakti se barna po hyjnë në Shqipëri nëpërmjet rrugëve të dyshimta. Barna pa pullë dhe pa asnjë siguri për jetën e pacientit. Edhe një paciente u shpreh publikisht se ilaçi i blerë prej saj në farmaci për kimioterapinë, ishte pa pullën përkatëse.
Një gjë e tillë ngre dyshime të mëdha lidhur me mënyrën se si Ministria e Shëndetësisë dhe Fondi i Sigurimit të Detyrueshëm të Kujdesit Shëndetësor po “veprojnë” me tregun e barnave.
