Mbetjet spitalore të Spitalit Rajonal të Lezhës hidhen në mes të ditës në kontejnerët e mbetjeve urbane. Pamjet e siguruara nga ‘BalkanWeb’ tregojnë një moment kur një punonjëse e spitalit hedh mbetjet spitalore tek kazanët ku njerëzit hedhin mbetjet e konsumit të përditshëm.
Këto mbetje, të aksesueshme lehtësisht nga fëmijët, janë burim infeksionesh dhe rrezikues për shëndetin e fëmijëve dhe të rriturve.
Ndërkohë, drejtuesit e Spitalit Rajonal të Lezhës, në një reagim për ‘BalkanWeb’, pranojnë se në kontejnerë kishte mbetje të rrezikshme spitalore, por, sipas tyre faji është edhe i Bashkisë që ka lëvizur kontejnerët e mbetjeve jashtë rrethimit të spitalit.
Në një prononcim për mediat, shefi i Shërbimit Mjedisorë pranë këtij spitali, Ervin Haxha, kërkon nga Bashkia e Lezhës që të vërë në dispozicion një kontejner të posaçëm që t’i vihet në dispozicion vetëm spitalit.
