Tre pacientë të prekur nga koronavirusi në Lezhë e kanë fituar betejen me këtë sëmundje.
Lajmi konfirmohet nga Spitali Rajonal i Lezhës, ku mes të shëruarve janë dhe 2 bluza të bardha, një infermiere dhe një punonjëse e shërbimit mjedisor të spitalit, të cilët ishin nfektuar 2 javë më parë pas kontaktit që kishin patur me një paciente të diagnostikuar me Covid-19.
Nga testimet e bëra ditët e fundit të tre pacientet kanë rezultuar negativ, ndërsa bëhet e ditur se dhe personat e tjerë të prekur nga koronavirusi ndodhen në gjendje të stabilizuar shëndetësore.
Ndërkohë prej 4 ditësh në Lezhë nuk janë konfirmuar raste të reja me Covid-19, pasi të gjitha testimet që ju janë bërë personave të dyshuar kanë rezultuar negativ.
Duke falenderuar qytetarët për bashkëpunimin e deritanishëm, Spitali Rajonal Lezhë bën thirrje që të vazhdohet respektimi me përpikmëri rekomandimet mjekësore si dhe zbatimin korrekt të masave të ndërmarra për distancimin social.
