Ndërtimi i depos qendrore të barnave të QSUT me vlerë 168 milionë lekë, ka nisur në vitin 2018 dhe pritet të përfundojë në Shtator të vitit 2019. Depo do të pajiset edhe me aparatura moderne. Depo qendrore e barnave në QSUT do të ketë 7 dhoma frigoriferike, 6 prej të cilave arrijnë temperaturën deri në – 20 gradë dhe 1 dhomë frigoriferike 0 – 8 gradë, për ruajtjen dhe magazinimin e barnave dhe materialeve të mjekimit, sipas standardeve më të mira bashkëkohore.
Godina e re qendrore për ruajtjen dhe sigurinë e barnave do të ketë edhe karantinë për barnat e skaduara apo materiale të rrezikshmërisë së lartë.
Me ndërtimin e depos së re të barnave, investim i buxhetit të shtetit, do të ketë edhe më shumë kontroll për gjithë sistemin e qarkullimit të barnave sipas shërbimeve në QSUT.
“Me përfundimin e ndërtimit të depos qendrore në QSUT do të garantohet më shumë siguri për qytetarët për ruajtjen e medikamenteve dhe materialeve mjekësore sipas standardeve bashkëkohore”. Ministrja Manastirliu inspektoi punimet për ndërtimin e depos së re të barnave në Qendrën Spitalore Universitare “Nënë Tereza” në Tiranë.
