Gazetare: Klevisa GJIKA
Ashpërsohen masat për subjektet në zonat turistike që nuk zbatojnë protokollet e sigurisë të vëna për pengimin e përhapjes së koronavirusit. Në fjalën e saj në kuvend, ministrja e Shëndetësisë dhe Mbrojtjes Sociale ka deklaruar se do ketë gjoba dhe mbyllje aktivitetesh në rast të shkeljes së masave.
“Parashikohet dënimi me gjobë 700,000 (shtatëqind) mijë lekë dhe në rast përsëritjeje, parashikohet edhe mbyllja e veprimtarisë, duke synuar të mbrohet shëndeti i turistëve në zonat e plazheve, nga infeksioni SARS COV2. Çdo shkelje do të ndëshkohet pasi konsiderohet kërcënim i shëndetit të qytetatëve! Për këtë arsye, nëpërmjet këtij akti normativ, do të forcohen penalitetet për subjektet që ushtrojnë veprimtari në zonat turistike”
Manastirliu risolli në vëmendje faktin se shumë njerëz nuk besojnë në ekzistencën e këtij virusi.
“Akoma mes nesh që thonë se s’ka Covid! Po nuk e besoni, shkoni tek infektivi, ku aktualisht 6 persona janë të intubuar, mes tyre tre janë në moshë të re: 45, 46, 49 vjeç. Kjo nuk është lojë. Kush e konsideron lojë apo konspiracion, na rrezikon të gjithëve, Duhet marrë me shumë seriozitet kjo situatë, është shumë serioze”, tha ministrja.
Ajo e mbyyli fjalimin e saj duke i bërë apel të gjithë qytetarëve që të respektojnë disa rregulla të thjeshta që të minimizohet sa më shumë të jetë e mundur përhapja e mëtejshme e koronavirusit.
