Përshtati në shqip për “Shendeti.com.al”: Blertina Koka
Mark Zuckerberg dhe bashkëshortja e tij Priscilla Chan njoftuan sot se fondacioni i tyre do të dhurojë 3 miliardë dollarë për të zhvilluar një plan për “kurimin e të gjitha sëmundjeve” deri në fund të shekullit XXI.
Synimi nuk është që mos të ketë asnjë të sëmurë, shpjegoi Chan, por të ketë një rënie drastike në numrin e të sëmurëve në të gjithë globin. Ky donacion do të administrohet nga Nisma Chan Zuckerberg. Kjo nismë ka si qëllim t’u japë mundësinë hulumtuesve shkencorë të fokusohen në projekte më të rrezikshme dhe të kenë mundësi të punojnë si kodues në një startup ambicioz në Silicon Valley.
“Kështu do të kemi mundësi të shikojmë projekte që mund të kërkojnë 20 apo 50 vite”, thotë Zuckerberg.
Drejtuese e projektit do të jetë neurobiologia Cori Bargmann, e cila ka dhënë kontributin e saj në disa studime shkencore mbi kancerin e sëmundje të ndryshme.
Ja cilat janë tre synimet kryesore të Nismës Chan Zuckerberg.
- Të mundësojnë bashkëpunimin midis ekipeve të shkencëtarëve dhe laboratorëve në universitete të ndryshme në të gjithë botën, për periudha të gjata kohe.
- Të fokusohen në zhvillimin e mjeteve të duhura për zhdukjen e sëmundjeve dhe jo vetëm për trajtimin e tyre.
- Për të përmirësuar dhe zgjeruar financimet shkencore edhe më shumë.
Hapi i parë për arritjen e këtyre synimeve do të jetë bashkëpunimi midis Universitetit Stanford, Universitetit San Francisco dhe Universitetit Berkeley, i quajtur Biohub.
Projekti i parë i Biohub do të fokusohet në krijimin e një harte të funksionit dhe vendndodhjes së çdo qelize në trup, që do të quhet “Atlasi i qelizave”. Ky atlas do të shërbejë si një burim me rezolucion të lartë për të gjithë biologët që duan të zhdukin origjinën e sëmundjes.
Projekti i dytë i Biohub, “Nisma për sëmundjet ngjitëse” do të fokusohet në zhvillimin afatgjatë të mjeteve për zhdukjen e sëmundjeve ngjitëse.
Shkencëtarët në të tri universitetet do të kenë gjithashtu mundësi të punojnë për një periudhë 5-vjeçare për ide të rrezikshme dhe ambicioze, që nuk financohen nga burime tradicionale.
Burimi: Business Insider / https://shendeti.com.al/
