Nëse kryeni marrëdhënie seksuale, është e rëndësishme të mbroheni nga një shtatzëni e paplanifikuar. Metoda tradicionale (tërheqja) është vetëm 70% efektive, që do të thotë që nëse një çift përdor si metodë mbrojtëse nga shtatzënitë e paplanifikuara tërheqjen, në 10 femra, 3 prej tyre do të mbeten shtatzënë.
Prezervativët ofrojnë mbrojtje jo vetëm nga shtatzënitë e paplanifikuara, por gjithashtu dhe nga infeksionet seksualisht të transmetueshme, përfshirë dhe infeksionin HIV. Përdorimi i prezervativit kërkon mirëkuptimin e të dy partnerëve dhe është efektive vetëm nëse përdoret çdo herë në mënyrë korrekte.
Çfarë duhet bërë kur metoda që po përdorni ju dështon?
Në rastet kur prezervativi nuk vendoset në mënyrën e duhur, çahet apo rrëshqet gjatë marrëdhënies, apo nëse keni pasur marrëdhënie seksuale të pambrojtura, ju duhet të merrni kontraceptivin e urgjencës në mënyrë që të parandaloni një shtatzëni të paplanifikuar. Ka disa lloje kontraceptivësh të urgjencës që gjenden në çdo farmaci.
Si përdoret Kontraceptivi i Urgjencës (KU)?
Ajo çfarë duhet të bëni është të merrni dy tabletat që gjenden në kuti sa më shpejt të jetë e mundur, por jo më vonë se 5 ditë (120 orë) pas marrëdhënies seksuale të pambrojtur. Sa më herët të merren tabletat e kontraceptivit të urgjencës aq më të mëdha janë shanset për të parandaluar një shtatzëni të paplanifikuar.
KU është i sigurtë dhe i përshtatshëm për ÇDO GRUA në çdo situatë.
Nëse keni një jetë seksuale të vazhdueshme apo të rregullt, ka metoda të tjera kontraceptive që ju mund të përdorni për t’u mbrojtur nga shtatzënitë e paplanifikuara, të tilla, si: tabletat ditore kontraceptive, injeksionet kontraceptive dhe spiralja.
Konsultohuni me mjekun apo shkoni në qendrën shëndetësore ku mund të merrni ndihmën e duhur mbi zgjedhjen e metodës kontraceptive që i përshtatet nevojave tuaja.
Metodat kontraceptive bashkëkohore gjenden në çdo farmaci.
