Në Spitalin Rajonal të Qarkut të Durrësit, i cili mbulon shërbimin e 450 mijë banorëve dhe trefishohet në sezonin turistik, ka rifilluar punë pas 7 viteve me disa pajisje të reja laboratori anatomo-patologjik, si dhe i janë shtuar kapacitetet diagnostifikuese laboratorit kliniko-biokimik.
Në përurimin e vënies në funksionim të pajisjeve të reja ka marrë pjesë edhe ministri i Shëndetësisë, Ilir Beqaj. Ndërsa theksoi se rritja e kapaciteteve diagnostifikuese shkurton rrugën e pacientëve të Durrësit që më parë dërgoheshin në Tiranë, Beqaj u ndal tek gjendja aktuale e krediteve që kanë mjekët. Ai tha se nëse situata vijon të mbetet e tillë, rreth 40% disa prej bluzave të bardha nuk do ta ushtrojnë më profesionin e tyre. Ky “kërcënim” vjen pas deklaratës së dhënë disa muaj më parë nga Beqaj, që pati vënë muajin qershor si kufirin në të cilin do të merreshin masa për mjekët që s’kanë kreditet e duhura. Sipas kreut të Urdhrit të Mjekut, Din Abazaj, janë 1246 punonjës të shëndetit që janë me kredite zero, që nënkupton një nivel zero i tyre në marrjen e njohurive të reja në fushën e mjekësisë.
