Spitali i Traumës vetëm pak ditë më parë priti ministrin e Shëndetësisë, Ilir Beqaj, i cili përuroi rezonancën 
magnetike. Mjekët që punojnë në këtë spital bëjnë të ditur se në po këtë ditë, kabllot e internetit të Spitalit u prenë nga drejtoria duke u hequr kështu shërbimin e internetit, i cili në fakt paguhet nga vetë mjekët e spitalit, pasi ata e kanë kontraktuar.
Shkak për këtë duket se ka qenë “estetika” e spitalit, pra që ministri mos të shihte kabllot e varur në sipërfaqe.
Lidhur me faktin në fjalë, gazeta “Shëndet+” mori edhe prononcimin e drejtorisë së Spitalit të Traumës. Kryeinxhinieri Azis Toska tha se prerja e kabllove është bërë sepse mjekët e kanë lidhur internetin me mendjen e tyre dhe për më tepër, në rrugë ajrore. “Duhet të kini parasysh se nga gjithë kabllot e prera, vetëm dy ishin funksionalë. Ne do të bëjmë të mundur që interneti të rilidhet, por me kabllo nëntokësorë, dhe jo në ajër”, u shpreh Toska./D.C.
