Ministria e Shëndetësisë njofton se nga dita e shtunë, 18 korrik, përditësimi ditor i situatës së koronavirusit do të ndryshojë. Informacioni i ri do të transmetohet në ERTV në orën 16:00 dhe në faqen e ministres Ogerta Manastirliu, dhe jo më gjatë paradites.
Arsyeja e ndryshimit të transmetimit të informacionit dhe orarit për situatën me pandeminë në vendin tonë, sipas ministrisë, ka të bëjë me fluksin e lartë të punës në ISHP, zgjerimin e kapaciteteve të testimit dhe raportimin e zgjeruar në 24 orë.
Njoftimi i plotë
Nisur nga fluksi i punës 24/7, në Institutin e Shëndetit Publik, ku po punohet pa ndërprerje në çdo orë të ditës dhe natës, prej më shumë se 4 muajsh, si dhe nisur nga zgjerimi i kapaciteteve të testimit dhe për të përmbushur raportimin 24 orë, përditësimi i situatës së shkaktuar si pasojë e COVID-19, duke filluar nga dita e shtunë, datë 18 korrik, e në vijim, do të jetë live në orën 16:00 në ERTV dhe në faqen e ministres Manastirliu.
