Testimi i menduar nga Ministria e Shëndetësisë për bluzat e bardha u pretendua se do të bënte thjesht një “kontroll” të situatës së institucioneve shtetërore. Kundërshtimit të fortë të mjekëve, ministria iu përgjigj me faktin se testimi “nuk rrezikon askënd”.
Megjithatë, duket se edhe nëse nuk janë lëvizur nga vendi i tyre i punës, ka ende mënyra të tjera për t’u hakmarrë ndaj bluzave të bardha. Mjeku Tritan Kalo, një nga zërat më të fortë kundër testimit, i cili deri dje ishte në listën e anëtarëve të këshillit bashkiak të Tiranës, tashmë nuk ekziston më në këtë listë.
Tritan Kalo është një ndër mjekët më të respektuar në Qendrën Spitalore Universitare “Nënë Tereza” në Tiranë. Është i vetmi mjek shqiptar i diplomuar në Francë në fushat e sëmundjeve infective e tropikale, si dhe reanimacionit mjekësor.
I kontaktuar nga gazeta “Shëndet+”, mjeku Tritan Kalo, emri i të cilit ndodhet edhe në Sorbonë të Parisit mes studentëve të huaj të dalluar, thotë vetëm: “Lufta për fjalën e lirë e ka shumë të rëndë edhe çmimin me të cilën e paguan atë”./ A.Gjypi
