Mishi me bamje (për 4-5 persona) përgatitet me këto asortimente:
Mish 500 gr- Bamje 1 kg
- Vaj, 2 filxhanë kafeje
- Qepë, 2 kokrra mesatare
- Domate, 4-5 kokrra mesatare
- Kripë
- Piper
- Uthull deri ½ gotë ujë
- Pak majdanoz.
Bamjet pasi lahen e pastrohen, iu pritet bishti në formë konike ose kapuçi, spërkaten me uthull e kripë dhe lihen për pak kohë që të zbutet pushi. Copat e mishit skuqen bashkë me qepët e grira hollë, këtu shtohen copat ose salca e domates.
Pasi kaurdisen të gjitha bashkë shtohet: kripa, piperi e disa gjethe dafine (spas dëshirës) dhe zihen në zjarr të lehtë me kujdes: kur është si mish qengji, me të ziejnë njëkohësisht edhe bamjet, kur është mishi i trashë atëherë bamjet hidhen më vonë për zierje: bamjet shpëlahen, kullohen dhe kaurdisen pak në tigan me vaj ose me yndyrë.
Në një tenxhere të cekët shtrohen feta domatesh dhe për rreth vendosen bamjet e rreshtuara me bishta anash në periferi dhe majat në mes, duke spërkatur çdo rresht me majdanoz e piper të zi.
Në mesin e tenxheres në vendin bosh, pa bamje vendosen copat e mishit, ku hidhet lëngu i mishit e mbi to vendoset përmbys një pjatë porcelani, që bamjet të ruajnë formën e tyre përgjatë zierjes, sipër mbulohen me kapak. Tenxherja vendoset në zjarr të lehtë për disa minuta. Gjella seriveret në pjatë bukur , mishi në mes dhe nash vendosen bamjet e rreshtuara në periferi të pjatës, ndërsa sipër spërkatet me lëngun e vet dhe me gjethëza majdanozi të grira imët.
