Elona Tereziu, gazeta “Shëndet+”
Mish me ofertë, në trotuare, me qeska dhe në diell. Kjo është panorama që të ofrojnë tregjet shqiptare, ndërkohë që AKU vazhdon e gjobit bashkitë e vendit. Vetëm pak ditë më parë Autoriteti Kombëtar i Kontrollit të Ushqimit gjobiti Bashkinë Tiranë me 300.000 lekë për mosadministrimin e duhur të tregjeve të hapura, ndërsa gjendja vazhdon të mbetet po e njëjtë.
Gjatë një vëzhgimi nga gazeta “Shëndet +” kemi konstatuar se në rrugën “Islam Alla” tregtohet lirisht mish në trotuar, që nuk dihet se si dhe nga vjen, ndërkohë që tregtari pohon se ka frikë, por gjer tani nuk ka pasur kontroll. “Shes fruta-perime zakonisht, por sot ndodhi që kisha mish. Frikë kam, por gjer tani s’kemi pasur kontroll.”
Të joshur nga oferta prej 350 lekësh të reja, kalimtarë të shumtë blejnë pa pasur frikë, duke rrezikuar kështu shëndetin e tyre, edhe pse sipas ligjit për therjen dhe tregtimin e mishit të kafshëve, neni 9,10 dhe 12 ndalohet rreptësisht tregtimi i tij në ambiente të hapura, rrugë kombëtare apo lokale, ndërkohë që ruajtja frigoriferike duhet bërë në 7-12 gradë./ https://shendeti.com.al/
