Krahas punës në shtet, mund të angazhohen edhe në strukturat private, por me detyrimin që të mos jenë pjesë e organeve të tyre drejtuese. Bëhet fjalë për shefat e shërbimeve të Qendrës Spitalore Universitare “Nënë Tereza” në kryeqytet. Në rregullat e përcaktuara për punësimet e reja në këtë qendër spitalore, është vendosur që shefat e shërbimeve të mos lejohen të kenë asnjë detyrë tjetër drejtuese në strukturat spitalore të rrjetit privat.
E për të dëshmuar këtë gjë, shefat e shërbimeve para emërimit duhet të plotësojnë një deklaratë të shoqëruar edhe me vërtetimin e lëshuar nga Ministria e Shëndetësisë.
Përzgjedhja e punonjësve të rinj që do t’i vijnë në ndihmë shërbimeve mjekësore të kësaj qendre do të zhvillohet nëpërmjet konkurrimit të hapur, si në stafet e mjekëve e infermierëve, ashtu edhe për postet më të larta drejtuese të klinikave. Rregulla të forta do të aplikohen edhe për punësimet e mjekëve të rinj. Aktualisht në të gjitha shërbimet po zhvillohen kontrolle të vazhdueshme në lidhje me punësimet e kryera gjatë vitit të shkuar, si dhe respektimin e orarit të punës nga personeli mjekësor.
Mjeku i QSUT-së ndalohet të përdorë mjetet e institucionit për qëllime private apo përfitim vetjak jashtë rregullave të parashikuara statutin e spitalit. Nëse kjo ndodh, atëherë mjeku do të largohet menjëherë nga vendi i tij i punës. Për kategoritë e tjera të punonjësve ku mund të lindë konflikt interesash, drejtoria e kësaj qendre spitalore do të hartojë një rregullore të posaçme, e cila do të bëhet publike brenda pak kohësh.
Mjekët që janë të angazhuar me kohë të plotë pune në klinikat e kësaj qendre spitalore, kanë të drejtë që të angazhohen me mësimdhënie në institucionet e arsimit shëndetësor publik. Por për të bërë këtë më parë duhet të marrin lejen përkatëse që duhet marrë nga drejtoria e përgjithshme e spitalit. Gjithashtu mjeku dhe familjarët e tij në gjini apo lidhje gjaku të afërt nuk mund të konkurrojnë dhe as të përzgjidhen në prokurime që organizon administrata e QSUT-së.
Procedura se si do të bëhet përzgjedhja
Në QSUT si rregull, personeli punësohet nëpërmjet konkursit. Vlerësimi për personelin e lartë mjekësor bëhet prej një komisioni të përbërë nga kreu i përgjithshëm i QSUT-së (kryetari), zëvendësdrejtorët, shefi i shërbimit përkatës dhe një përfaqësues nga drejtoria e Burimeve Njerëzore dhe Edukimit në Vazhdim. Ndërsa për personelin e administratës dhe personelin tjetër ndihmës respektohen dispozitat e Kodit të Punës.
Përzgjedhja mund të bëhet edhe kur paraqitet një kërkesë e vetme, vetëm në rastet kur provohet se është bërë njoftim publik për tre ditë rresht në një prej gazetave me tirazh më të madh. Në këto raste, në dosjen e praktikës përkatëse duhet të gjendet në çdo kohë një kopje e gazetës që ka shpallur njoftimin. Nëse kjo nuk gjendet, personi përgjegjës mban përgjegjësi sipas ligjeve në fuqi. Nga rregulli i mësipërm përjashtohen rastet kur merret në punë personel mjekësor me gradën profesor ose personel me kohë të pjesshme. Pedagogët ushtrojnë aktivitetin e tyre në bazë të një kontrate që lidhet me drejtorinë e spitalit.
Kontrata është e detyrueshme për të gjithë. Kontrata individuale e punës lidhet në pajtim të plotë me ligjin dhe kontratën kolektive të punës, që lidhet ndërmjet drejtorit dhe Sindikatës apo Sindikatave më të përfaqësuara./ Pranvera Kola
