Sistemi shëndetësor ishte dhe vazhdon të mbetet në fokus për shkak të pandemisë së krijuar nga SARS COV-2. Stafi mjekësor u përball jo vetëm me vështirësi, si: mungesa e mjeteve mbrojtëse, gjatë ushtrimit të profesionit të tyre, por edhe me pasoja në shëndetin e tyre.
Shoqata “Together for Life” me mbështetjen e Fondacionit “Konrad Adenauer” zhvilloi një studim me profesionistë të kujdesit shëndetësor publik, përmes të cilit nxorri në pah se bluzat e bardha kanë hasur vështirësi të mëdha gjatë pandemisë, duke qenë nën petkun e mjekut.
Interesant është fakti që mjekët shfaqen ndjeshëm më pak të sigurt e të mbrojtur nga infektimi sesa infermierët në vendin e punës. Referuar studimit, kjo është e kuptueshme teksa shohim se mjekët më shumë sesa infermierët kanë ngritur ankesa për mungesat e MMP-ve, i përdorin ato me kursim dhe shprehen se u mungon trajnimi për përdorimin e sigurt të MMP-ve.
Mjekët, duke qenë në kontakt direkt me pacientët e tyre e ndiejnë veten shumë më të rrezikuar për t’u infektuar nga koronavirusi. Kështu, bluzat e bardha nuk kanë ngurruar të shprehen se probabiliteti i prekjes nga COVID-19 është i lartë, nisur nga fakti se ata janë barriera e parë me të cilin përballet virusi ende në qarkullim.
